Numbers 6
A Vinara na Bakovi i Kaba na Nita Muholi
1E BAKOVI DAGI i takia e Moses, 2ge taki e huriki a Israel ge ta maea, “A bakovi o a ngatavine i rata a nita muholi ge habi mule ia ne nau na tahuna ranga, 3 anahea ge ninu a vain o ge ninu a bia. Nahea ge ninu a naruna vain, nahea ge kani a kanena vain i rara, nahea ge kani a kanena vain ni rara na haro. 4Na parava vakaroro ge nugutatea a nita muholi iea, ne vona ni habi mule ia ne nau, nahea ge kani a maki ni rata na kai, a vain. A pagana o kulina kanena vain, ngi ranga nahea ge kani.5“Na parava vakaroro ge ramaia a nita muholi iea ge habi mule ia ne nau. Nahea ge palakudua a vuna, nahea ge alia a karirana. Ra bakovi iea ne nau kunana. Na tahuna nga nahea ge palakudu a vuna o ge ali a karirana, lakea bara i malamala. 6Na parava vakaroro na tahuna i habi mule ia ne BAKOVI DAGI, nahea ge lakea tabukoi na podana viri i mate. 7E tamana, e kinana, a viri vona ranga ri mate, nahea ge lakea tabukoi ne ria, ma ge muto na matagu. A vuna i ola, i vakasiri i habi mule ia na Vure. 8Na parava vakaroro ge ramaia ra nita muholi ne vona ni habi mule ia ne nau, bara i malamala.
9“Bara bakovi tara ge mate vakaturutu na dahana, ra matenga na bakovi iea bara i vakamuto a vuna, ra i ta muholi vona ge nau. Ra bakovi iea ge dava na parava i polorua ge palia a vuna. Na parava nga i uka ma ge matapado na matagu. 10Na polotoluna parava ge bole a balu ge rua, ge bole valai na matana Kape na Vaponga, ge habi nau. 11A prister ge bolea tara, ge habia nau, ge a nihabi ni puga vuroki a naro hale, a balu tara ge a nihabi ni gi gutu-vuro. Ra bakovi i made tabukoi na podana bakovi i mate, i muto pali, ra nihabi nga i rua, ru kavitagua a bakovi iea. Na parava iea kunana, ra bakovi iea ge ru a kilakila vona tabu a vuna, ge ne nau tabu. 12Ge vakatubu tabu, ge gi a maka parava i ta muholi vona ge habi mule ia ne nau. Nahea ge luhoi ra parava ranga muga ra i habi ia ne nau, a vuhuna ra vuna i ta muholi vona ta ge nau i muto pali. Ra bakovi iea i muto pali, ngane ge bole vilia nau tara tuna sipsip a toga, a pida vona ge taku, ge a nihabi na rarenga.
13 b“Na tahuna a bakovi i hudotalea pali a nita muholi vona, ni gi bole ge pesi tabukoi na mataroho na Kape na Vaponga. 14Ge habi nau a nihabi ge tolu. Ge bolea tara tuna sipsip a toga ge tahoka a pida ge taku, ge a nihabi gutu-vuro, a tuna sipsip a kinana ge tahoka a pida ge taku, ge a nihabi na rarenga, a sipsip a toga ge gavutuvutu, ge a nihabi na nivalemu. 15Ge bole a bret i uka is ge tahoni na kulopi, ge bole valai, ge a nihabi. Ra kulopi iea ge tahoka a maka tabekena bret dagi ni rata na plaoa kamumu, ni vuli turana a namona oliv, turana a maka bisket ni ravu na vel. Ge ramaia a narona a nihabi iea ge ratea a nihabi na vit, a nihabi na vain.
16“A prister ge habi nau a maki nga ge rata a nihabi na naro hale, a nihabi gutu-vuro. 17Muri ge rabalakia a sipsip a toga, ge habi turana a maka bret ni tahoni na kulopi, ge a nihabi na nivalemu ne BAKOVI DAGI. A nihabi na vit, a vain ranga ge rata. 18Na tahuna a bakovi i hudotalea pali a nita muholi vona, ge made tabukoi na mataroho na Kape na Vaponga ge palia a vuna, ge bole a vuna ge ru na kanono ni gutu a nihabi na nivalemu vona.
19“Muri a prister ge bolea a gepena sipsip a toga, ge nonoa na ulo. Na tahuna a bobona sipsip i munae pali, a prister ge bole ranga bobona, ge bole talea na kulopi tara balena bret turana a bisket ge taku, ge ru na limana bakovi iea. 20Muri a prister ge bole mule na bakovi a maki ni kani nga, ge tabari iau vona. Ra nihabi iea, ne nau kunana, ge bole a prister ge kani. A siana, a pona sipsip a toga, ngi ranga ne vona a prister. Na tahuna a prister i rata lobo a maka naro nga, a bakovi iea i kara ni ninu a vain tabu.
21“Iea a vinara na bakovi i ta muholi ge habi mule ia ne nau e BAKOVI DAGI. Na tahuna a bakovi tara i ta muholi ge habia nau tara maki, ra ngava dagi i takia ge ta muholi vona.”
E Aron i Vakabagetu e Huriki a Israel
22E BAKOVI DAGI i takia e Moses, “O takia e Aron turane huriki e tuna bakovi, ri gi gamai e huriki a Israel vona a ngava kamumu nau. Ri gi ta maea,24‘E BAKOVI DAGI ge gamai mua,
ge tagari mua.
25A matane BAKOVI DAGI ge parai mua,
ge rata kamumu mua.
26E BAKOVI DAGI ge hate kamumu ne mua,
ge habi a nivalemu ne mua.’
27“Na naro iea kunana, e huriki a Israel bara ri galea a ragu e BAKOVI DAGI. Muri bara gamai ria.”
Copyright information for
BNP